• Ishonch telefoni:230-13-73
TARJIMA NAZARIYASI VA AMALIYOTI FAKULTETI

 

Ўзбекистон Республикаси Биринчи Президенти И.А.Каримовнинг 1992 йил 12 майдаги 401-сонли фармонига асосан Ўзбекистон давлат жаҳон тиллари университети ташкил қилинганлиги ҳамда халқ хўжалигининг турли соҳаларида халқаро алоқаларнинг кенгайиб борганлиги ва бунда малакали таржимонларга талаб ортганлигини инобадга олиб Ўзбекистон давлат жаҳон тиллари университетининг 1994 йил 24 октябрдаги 93-сонли буйруғига асосан университетнинг барча факультетларидан иқтидорли талабалар суҳбат асосида таржимонлик йўналишига ўқишга танлаб олинган ва Таржимонлик факультети ташкил этилган.

Таржимонлик факультетига 1994-1995 ўқув йилидан бошлаб “Инглиз тили қуйи курслар” кафедраси мудири, филология фанлари номзоди, доцент О.М.Муминов декан этиб, шу кафедранинг ўқитувчиси Ж.А.Рузметов декан муовини этиб тайинланган. Кейинги йилларда факультетга етук мутахассислардан, филология фанлари номзодлари Н.М.Қамбаров (2002-2009 йиллар), Т.А.Мадраҳимов(2009 йил), Ҳ.И.Ҳакимов (2009-2012 йиллар), И.М.Тухтасинов (2012-2013 йиллар) раҳбарлик қилишди. Ҳозирги пайтда ушбу лавозимда филология фанлари номзоди, доцент С.А.Зияева фаолият олиб бормоқда. Бундан ташқари факультетда С.Хажиев (1994-2009 йиллар), Д.Алимова (1996-2002 йиллар), Д.Носиров (2004–ҳ.в.), С.Шерхонов (2009-2012 йиллар), Ф.Султонов (2014–ҳ.в.), У.Азизов, А.Эркаев, Д.Жўраев, У.Йўлдошев, М.Тухтахужаевалар декан муовини сифатида фаолият юритишди.

Ўзбекистон давлат жаҳон тиллари университети Илмий кенгашининг 2011 йил 29 сентябрдаги йиғилиш қарорига биноан Таржимонлик факультети “Таржима назарияси ва амалиёти факультети” деб ўзгартирилди.

Факультет ташкил этилгандан бошлаб бир қатор кафедралар факультет таркибига киритилди, ҳозирги кунда эса 2 та: Таржимашунослик назарияси ва амалиёти ҳамда Шарқ филологияси кафедралари мавжуд.

Ўтган йиллар давомида факультетда Ўзбекистонда хизмат кўрсатган фан арбоблари Иброҳим Ғафуров, Амир Файзулло, филология фанлари докторлари Жамолиддин Бўронов (профессор), Шуҳрат Қориев (профессор), филология фанлари номзодлари Каримберди Раҳмонбардиев, Ёқуб Мўминов, Жамила Ғуломова, Муқаддас Хўжаева, Зулфира Галимуллина, Нишон Умбаров, Светлана Новикова, Тамара Крахмальная, Алина Гаврилова, Эргаш Соатжонов, Жуманазар Матёқубов, Патхиддин Нишонов, Темур Олтиев сингари катта амалий тажрибага эга бўлган соҳа мутахассислари ва маҳоратли таржимонлар ишладилар.

Ҳозирги кунда факультетда 2 та: таржима назарияси ва амалиёти (тиллар бўйича) ҳамда филология ва тилларни ўқитиш (хитой, япон ва корейс тиллари) таълим йўналишлари бўйича жами 395 нафар бакалавр, 25 нафар магистр таҳсил олаётган бўлиб, уларга 50 дан ортиқ тажрибали профессор-ўқитувчилар, таржимонлар ва чет эллик волонтёр-ўқитувчилартаълим бермоқдалар. Факультет ташкил қилингандан буён 3300 дан ортиқ бакалавр тугатиб, улар халқ хўжалигининг турли соҳаларида фаолият юритмоқдалар. Талабаларни замонавий талаблар асосида ўқитиш, уларнинг касб маҳоратини ошириш, хорижий тилларни пухта ўзлаштиришлари учун факультетда замонавий ахборот технологиялари билан жиҳозланган лингафон хоналари, синхрон таржимага мўлжалланган аудиториялар ишлаб турибди.

Kafedralar: