• Ishonch telefoni:230-13-73

Universitet haqida

O`zbekiston davlat jahon tillari universiteti (O`zDJTU) 1949-yilda Toshkent chet tillari pedagogika instituti nomi bilan tashkil etilgan. Universitet 70 yillik tarixga ega.

1992-yili Toshkent chet tillari pedagogika instituti hamda Respublika Rus tili va adabiyoti instituti birlashib, universitet maqomiga ega bo`ldi.

Bugungi kunda universitetda 10 000 ga yaqin talaba 30 ga yaqin tilni jahon ta’lim standartlari asosida o`rganmoqda. Har yili universitetda 11 ta ta’lim yo`nalishida bakalavr, 12 ta ta’lim yo`nalishida magistrlik darajasiga ega mutaxassislar tayyorlab chiqariladi.

Universitet talabalari chuqur bilim va ko`nikmalar asosida til o`rganish, o`qitish, tarjima va talqin qilish mahoratlarini egallab bormoqdalar. Kun sayin rivojlanib borayotgan tezkor zamonda ta’lim tizimi ham o`zgarishda. Shu bois til va madaniyat o`rtasidagi aloqa ta’lim tizimimizning asosiy tamoyillaridan biridir.

Ingliz tili 1-, 2-, 3-fakultetlari, Roman-german filologiyasi, Rus filologiyasi fakultetlarida bo`lajak pedagoglar til o`qitishning sir-asrorlarini o`rganmoqdalar, Tarjima nazariyasi va amaliyoti fakultetida esa ingliz, nemis, koreys, yapon, xitor tili yo`nalishlarida tarjima mahoratidan tahsil oladilar.

Aynan bizning oliy ta’lim muassasasida bir qator xorijiy tillar bo`yicha ko`nikmalarga ega bo`lgan talabalar bugungi kunda xalqaro miqyosda turli jabhalarda faoliyat ko`rsatmoqda. Universitetimiz bitiruvchilaridan yetuk tarjimonlar, chet tili o`qituvchilari, siyosatchilar, xalqaro tashkilotlar va turli qo`shma korxona vakillari yetishib chiqqani bizni quvontiradi hamda ertangi kunga yanada dadil va ishonch bilan qarashimizga yordam beradi.

2018-yili AQShning Vebster universiteti bilan imzolangan kelishuv asosida bir yillik magistratura akademik Dasturi tashkil qilindi. Bu magistratura Dasturi Markaziy Osiyoda yagona hisoblanib, butun dunyo yoshlari tahsil olishi mumkin.

O`zbekiston poytaxtida tashkil etilgan O`zDJTU chet tillarini o`qitish bo`yicha Markaziy Osiyoda yetakchi oliy ta’lim muassasasidir.

Ta’lim jarayoni jahon hamjamiyati talablariga javob beradigan tilshunoslar va tarjimonlar tayyorlashga qaratilgan. Binobarin, til xalqlar va elatlarni bir-biriga yaqinlashtiradigan, ular o`rtasidagi munosabatlarni rivojlantiradigan yagona vositadir.

O`zDJTUning bosh vazifalari quyidagilar:

• davlat ta’lim standartlariga muvofiq ilg`or, zamonaviy ta’lim va kasb-hunar dasturlari asosida yuqori samarada saviyali o`qitishni tashkil qilish va malakali kadrlar etishtirishni ta’minlash;

• yoshlarni milliy istiqlol g`oyasi va mafkurasi hamda umuminsoniy qadriyatlarni bilish, Vatan, oila, tabiatga mehr va insonparvarlik ruhida tarbiyalash;

• rivojlangan mamlakatlarning yutuqlaridan foydalanib, BMTning rasmiy tillari bo`yicha mutaxassislar tayyorlashning yangi kontseptsiyasini ishlab chiqish va amalga oshirish;

• barcha ta’lim tizimlari uchun chet tillari o`qituvchilarini, tarjimonlarni tayyorlash;

• turli xil tajribalar o`tkazish yo`li bilan o`qitishning komp’yuter texnikasi va audiovizual vositalarini qo`llagan holda chet tillarni jadal o`rgatish usullarini joriy qilish;

• yuqori malakali xalqaro jurnalistlarni tayyorlash;

• tegishli sohadagi xorijiy ta’lim muassasalari bilan bevosita aloqalar o`rnatish, ular bilan hamkorlik to`g`risida uzoq muddatli shartnomalar tuzish;

• o`zining intellektual imkoniyatlaridan foydalanish hisobiga valyuta mablag`lari jamg`armasini tuzish;

• universitetning moddiy-texnika negizini mustahkamlash va uning mulkini ko`paytirish.

Chop etish
-->