2019-yil 23-sentabr kuni O`zDJTUda  O‘zbekistondagi AQSh elchixonasi Madaniyat masalalari bo‘yicha maslahatchisi Joan Kramb xonim va Ingliz tili mutaxassisi Baxia Dayfenbax bilan uchrashuv bo‘lib o‘tdi. 

Muloqot chog‘ida rektor G‘. Raximov O‘zDJTU faoliyati hamda AQSh bilan ta’lim va madaniyat sohalaridagi o‘zaro hamkorlik masalalariga to‘xtalib o‘tdi. Jumladan, AQSh elchixonasi va AQSh Davlat Departamenti moliyaviy ko‘magida O‘zDJTUda bir qator loyihalar amalga oshirilganligi, ingliz tilini o‘qitishning zamonaviy metodlarini joriy qilish, bilimni baholash, ilmiy tadqiqotlarni rivojlantirish va nufuzli xalqaro jurnallarda maqolalar chop etish sohasida olib borilgan samarali hamkorlikdan mamnunligini ma’lum qildi. 

Kramb xonim kelgusida ushbu yo‘nalishlarda olib borilayotgan ishlarni davom ettirishga ko‘maklashishini ma’lum qilib, Dayfenbax xonim 25-sentabrdan boshlab 3 oy mobaynida chet tillari bo‘yicha bilim va ko‘nikmalarni baholash bo‘yicha seminar-treninglar o‘tkazishini, ushbu soha mutaxassislari, jumladan testologlarni tayyorlashga o‘zining munosib hissasini qo‘shishini ta’kidlab o‘tdi. 

Shu bilan birga, 16-17 oktabr kunlari AQSh elchixonasi moliyaviy ko‘magida nufuzli xalqaro konferensiyani tashkil qilish bo‘yicha ishlar qizg‘in ketayotganligi, ushbu tadbirda Hududiy ingliz tili ofisi (RELO) tashkiloti va ingliz tili bo‘yicha malakali mutaxassis va ekspertlar jalb etilishi e’tirof etildi. 
Tomonlar ushbu yo‘nalishdagi hamkorlikni yanada rivojlantirish bo‘yicha kelishib oldilar.