Xalqaro aloqalar bo'limi
Oʻzbekiston davlat jahon tillari universiteti Xalqaro hamkorlik boʻlimi Oʻzbekiston Respublikasi Prezidentining 1992-yil 12-maydagi 401-sonli qaroriga asosan universitet tashkil topgan kundan boshlab oʻz faoliyatini boshlagan.
Boʻlim vazifalari:
- Oʻzbekiston davlat jahon tillari universitetini xalqaro maydondagi nufuzini oshirish, xorijiy tillarni mukammal biladigan malakali mutaxassislar, shuningdek yuqori darajadagi xalqaro sammitlar, forumlar, madaniy va sport tadbirlarida xizmat koʻrsata oladigan tajribali jurnalistlar va tarjimon/referentlar tayyorlaydigan respublikaning yetakchi universiteti sifatida namoyon etish
- Universitetning xalqaro aloqalarini rivojlantirishda turli boʻlimlar, fakultetlar va kafedralarning faoliyatini muvofiqlashtirish
Oʻzbekiston Respublikasida akkreditatsiyadan oʻtgan nufuzli xalqaro tashkilotlar hamda xorijiy mamlakatlarning yetakchi oliy ta’lim muassasalari, ilmiy markazlari bilan oʻzaro manfaatli hamkorlikni oʻrnatish va rivojlantirish
- Oʻzbekiston davlat jahon tillari universitetida xorijiy talabalar, ilmiy tadqiqotchilar va professor-oʻqituvchilarning tahsil olishlari, tadqiqot olib borishlari, ma’ruzalar oʻqishi, amaliy mashgʻulotlar va master-klasslar oʻtkazishi uchun qulay sharoitlar yaratish
- Xalqaro tashkilotlar, vazirliklar, xorijiy hamkor universitetlar delegatsiyalarining tashriflarini tashkil etish, tomonlar o’rtasida ta’lim sifatini oshirish, o’quv jarayonini takomillashtirish, talabalar, tadqiqotchilar va oʻqituvchilar almashinuvi dasturlarini yoʻlga qoʻyish, xalqaro konferensiyalar, forumlar va seminarlar, shuningdek boshqa tadbirlar doirasida turli sohalarda kelgusidagi ikki tomonlama hamkorlik masalalarini muhokama qilish
- Universitet talabalari, doktorantlari va professor-oʻqituvchilarini hamkor universitetlarga ta’lim olishi, bilim va malakalarini oshirishi, ma’ruzalar o’qish, xalqaro konferensiyalar, seminarlar va vebinarlarda ishtirok etish uchun yuborish
- Yevropa Ittifoqining ERASMUS+ dasturi doirasidagi loyihani oʻz ichiga olgan xalqaro ta’lim va ilmiy loyihalarni ishlab chiqish hamda amalga oshirish ishlarini muvofiqlashtirish
Hozirgi kunda Universitet jahonning 150 dan ortiq oliy ta’lim muassasalari bilan yaqindan hamkorlik qilmoqda. Ular AQSH, Yevropa, G’arb, Arab, Afrika va MDH davlatlarining oliy ta’lim muasasalaridir. Ular orasida dunyoning TOP universitetlari, jumladan, Arizona Universiteti, Vebster Universiteti, Perdyu Universiteti (AQSH), Sank-Peterburg Davlat Universiteti, Moskva Davlat lingvistika Universiteti, Qozon Federal Universiteti (Rossiya), Sorbonna universiteti, Parij 2 universiteti (Fransiya), Gumboldt universiteti, Heidelberg universiteti, Bochum-Rur universiteti (Germaniya), Sevilya universiteti, Jaen universiteti, Kadis universiteti (Ispaniya), Reading universiteti, Portsmut universiteti (Buyuk Britaniya), Sulton Qabus universiteti (Oʻmon Sultonligi), Pekin xorijiy tillar universiteti, Shanxay xorijiy tillar universiteti, Tyanjin xorijiy tillar universiteti, Pekin tillar va madaniyat universiteti (Xitoy), Toyo universiteti, Tsukuba universiteti, Wakayama universiteti, Yaponiya raqamli universiteti, Tokio onlayn universiteti (Yaponiya), Soongsil universiteti, Pusan xorijiy tillar universiteti (Koreya), Ahmad Yassaviy nomidagi xalqaro qozoq-turk universiteti, Xalqlar do‘stligi universiteti (Qozog‘iston) va boshqalar.
Hamkorlikning asosiy yoʻnalishlari talabalar, ilmiy xodimlar, oʻqituvchilar va maʼmuriy xodimlar almashinuvi, qoʻshma va xalqaro taʼlim va ilmiy loyihalar, oʻquv-uslubiy adabiyotlar va ilmiy maqolalar chop ettirish, xalqaro konferensiyalar, forumlar, simpoziumlar, seminarlar, vebinarlar, o‘qituvchilar malakasini oshirish va qayta tayyorlash faoliyati, qo‘shma ta’lim dasturlarini amalga oshirish, qishki va yozgi maktablar tashkil qilish va boshqalar.
2023/2024 oʻquv yilida 181 nafar oʻqituvchi va 186 nafar talaba (bakalavr, magistr, PhD) hamkor universitetlarga oʻqish, malaka oshirish kurslarida qatnashish, xalqaro konferensiyalar, seminarlar, vebinarlarda ishtirok etish imkoniyatiga ega bo’ldilar. Universitetning rasmiy delegatsiya a’zolari xorijiy mamlakatlar universitetlariga hamkorlikni yanada rivojlantirish masalalari bo‘yicha muzokaralar olib borish uchun tashrif buyurdilar.
Hamkor universitetlar, elchixonalar, AQSH elchixonasi, KOICA, JICA, TIKA va shu kabi xalqaro tashkilotlar universitet talabalari va oʻqituvchilari uchun maʼruzalar oʻqish, amaliy mashgʻulotlar va mahorat darslarini oʻtkazish uchun koʻngilli oʻqituvchilarni universitetimizga yubormoqda.
Universitet har yili xorijiy davlatlarning O‘zbekistondagi elchixonalari, xalqaro tashkilotlar va universitetlar bilan hamkorlikda xalqaro konferensiyalar tashkil etadi. Jumladan, AQSHning Oʻzbekistondagi elchixonasi har yili mamlakatimizda ingliz tilini oʻqitishni rivojlantirish boʻyicha xalqaro konferensiya oʻtkazishga moliyaviy koʻmak beradi. Britaniya Kengashining O'zbekistondagi vakolatxonasi bilan hamkorlikda PRESETT loyihasi boʻyicha xalqaro konferensiya tashkil qilinadi. Toshkentdagi arab davlatlarining elchixonalari har yili dekabr oyida BMT tomonidan e’lon qilingan “Xalqaro arab tili kuni”ga bag‘ishlangan yillik xalqaro konferensiyani qo‘llab-quvvatlamoqda.
Universitet talabalari, tadqiqotchilari va oʻqituvchilari hamkorlar tomonidan kelishilgan shartlar va qoidalar asosida malaka oshirish kurslari, ilmiy loyihalar, xalqaro konferentsiyalar va seminarlarda ishtirok etish uchun hamkor universitetlarga tashrif buyurishadi. Oʻz navbatida hamkor universitetlar vakillari oʻzaro hamkorlik asosida universitetga tashrif buyuradi.
Talabalar va o‘qituvchilar, fakultet rahbarlari turli ko‘rik-tanlov, viktorina va tadbirlarda faol ishtirok etib, bunday tadbirlarda yetakchi o‘rinlarni egallab kelmoqda. Jumladan, xitoy tilini o‘rganayotgan o‘quvchilar “Xitoy ko‘prigi” tanlovida ishtirok etib, dastlabki uch o‘rinni egalladi va bu yil Pekinda bo‘lib o‘tadigan tanlovning final bosqichida ishtirok etadi. Yaponiyaning O‘zbekistondagi elchixonasi tomonidan o‘tkazilgan Nutq tanlovi (Speech Contest)da yapon tili guruhi talabalari ham yetakchi o‘rinlarni egalladi. Rus filologiyasi fakulteti dekani rus tili boʻyicha eng yaxshi pedagog xalqaro tanlovida ishtirok etib, 1-oʻrinni egalladi va 2024-yil sentabr oyida Rossiya Federatsiyasida boʻlib oʻtadigan sovrinlarni topshirish marosimida ishtirok etadi.
Hozirgi kunda universitet Yaponiya raqamli universiteti, Moskva davlat lingvistika universiteti va Rossiyaning Adigey davlat universiteti bilan qoshma ta’lim dasturini amalga oshirib kelmoqda. Hozirgi kunda Xitoy, Rossiya va Turkiya universitetlari bilan qoʻsh diplom dasturlarini joriy etish ustida ish olib borilmoqda.
Xorijiy talabalarni oʻzbek xalqining madaniyati, tarixi va anʼanalari bilan tanishtirish maqsadida, Universitet qishki va yozgi lagerlar yoki til kurslari va Oʻzbekistonning tarixiy shaharlariga sayohatlarni oʻz ichiga olgan dasturlarni tashkil etadi. AQShning Arizona universiteti va Germaniya universitetlari talabalari uchun ham shunday dasturlarni tashkil qildi. Bu yil Xitoy, Yaponiya va Indoneziyadan talabalarni mana shunday dasturlarda ishtirok etishlari rejalashtirilgan.
Yuklab olish 
